Հայկական կողմն ունի 1 զոհ, ևս մի քանի զինծառայող վիրավոր է․ ՊՆ

Այսօր կեսօրին Ադրբեջանի զինված ուժերի (ԶՈւ) ստորաբաժանումների ձեռնարկած նախահարձակ գործողությունների արդյունքում ծավալված փոխհրաձգության հետևանքով հայկական կողմն ունի մեկ զոհ, ևս մի քանի զինծառայող վիրավոր է։

Այդ մասին հայտնում է ՀՀ պաշտպանության նախարարությունը (ՊՆ)՝ նշելով, որ զոհված զինծառայողի տվյալները, ինչպես նաև տեղեկություններ վիրավոր զինծառայողների առողջական վիճակի մասին կհաղորդվեն ավելի ուշ։

Միաժամանակ տեղեկացվում է, որ ժամը 14։30-ի դրությամբ փոխհրաձգությունը դադարել է, իրավիճակը գտնվում է ՀՀ ԶՈւ լիարժեք վերահսկողության ներքո։

Պաշտպանական գերատեսչությունն ավելի վաղ հայտնել էր, որ այսօր՝ դեկտեմբերի 10-ին, ժամը 12։00-ի սահմաններում, Ադրբեջանի ԶՈւ ստորաբաժանումները հարձակում են գործել հայ-ադրբեջանական սահմանի արևելյան ուղղությամբ տեղակայված հայկական մարտական դիրքերի վրա։ Նշվել էր, որ հայկական կողմի պատասխան գործողությունների արդյունքում հակառակորդը, կրելով մարդկային կորուստներ, հետ է շպրտվել ելման դիրքեր։ 14։25-ին հաղորդվել էր, որ այդ պահին փոխհրաձգությունը շարունակվում է։